فضفضة مع اعز الناس

حاسة ان بعدك مفيش حجات كتير يتبكى عليها عارفة يا امى لو الدنيا كلها فارقتنى مش هزعل زى ما زعلت علي فراقك وحشتينى دى قليلة قوي نفسى اجرى عليكى واترمى فى حضنك وافضل اعيط كتير من غير سبب عارفة محتاجة الضمة دى منك انت بس ...انت بس
عارفة يا امي الدنيا خدتني شوية وبطلت احلم بيكي كل يوم زي الاول بس اول ما حسيت بالضيقة محنتش غير ليكي عارفة ليه لانك كنت احن من نفسي عليا
عارفة انا نفسي انزل مصر عشان ازور قبرك يمكن تحسي بيا وترجعي تاني تجيلي في الحلم
محتاجة اسمع صوتك وضحكتك وملامحك الى وحشتنى وخايفة انساها وكل ما اخاف انساها اجرى ع صورتك ابص كتير اوى وكانى بخزنها جوايا تانى
محتاجااااااااااكى كتير اد عمرى الى فات وانت مش موجوده فيه اد تفاصيلى الى انت مشوفتهاش اد حياتى والى جد فيها وانت متعرفهوش اد حجات كتير اوى اوى نفسي افضفض معاكي انتي بس صفاء النهاردة قالتلي لو مش عايزة تتكلمي معايا كلمي حد من صحابك اللي بترتاحي معاهم ملقتش صاحبة احن منك مشتاقة للضحكة منك بس ونظرة من عينيك حتى ولو كانت لوم وعتاب مشتاقة لصوتك حتى ولو كنت بتزعقيلى وترجعى تانى تطبطبى عليا وتقوليلى متزعليش هو ليه الواحد بيبقى ضعيف اوى كده ومش مستحمل حاجة لما يبقى من غيرك
هو انا ليه مش عارفة انساكي هو انا ليه لما بكون محتاجة لحد يطبطب عليا بفتكرك انتي بس
لما ببكي الكل بيفكر ان بكايا بسبب مشكلة معينة ومحدش عارف ان بكايا كله عليكي في كتير فالدنيا حنينين بس مفيش حد في حنيتك مفيش حد بيعرف يحتويني زيك عارفة يا امي بيتهيألي لو فقدت الذاكرة برضو مش هنساكي انتي ليه كنتي حنينة كده ليه مكنتيش اسيه زي ناس كتير وليه زرعتي فيا حجات كتير منك عارفة انا مش زعلانة لان فيا كتييير منك بس اللي مزعلني ان الدنيا بقت وحشة بشكل وحش مبقاش فيها مكان للناس الطيبة اسأل الله ان يرحمك ويغفر لكي ولكل اموات المسلمين